Tránsito de Mercurio

Hoxe tivo lugar un fenómeno que non poderemos volver a ver ate o 13 de novembro de 2032: un tránsito do planeta Mercurio.

A semana pasada convocamos un obradoiro para saber máis sobre o que era e que condicións se tiñan que dar para que sucedera, e hoxe sobre as dúas e vinte da tarde saímos fora para ver se as nubes nos deixaban desfrutalo, pero non puido ser...

Pola tarde o tempo foi máis benévolo e puidemos velo. Aquí tedes algunhas imaxes da proxección do Solarscope:

Igual tedes que ampliar as imaxes para poder aprecialo. Mercurio é ese pequeno puntiño negro preto do centro do disco solar. Lembremos que o raio de Mercurio é aproximadamente 1/286 parte do raio do Sol.

Comezo do curso...

Arrancamos este novo curso con moitas ganas de facer cousas divertidas...
O noso obxectivo para este ano é conseguir que o alumnado participe en todas as actividades propostas...
E a primeira delas... celebrar o Samaín coas nosas CABAZAS MATEMÁTICAS...
Veñen de distintos países e distintas épocas pero todas elas teñen algo en común, a todas lles entusiasman as matématicas... 

O pasado mércores xogamos con elas, @s nos@s intrépid@s participantes tiñan que atopar as cabazas que tiñan as solucións a uns enigmas propostos polas profes de mates. Agardamos que lles gustase a actividade e que participen coas mesmas ganas na próxima!

Alguén dubida aínda da utilidade das matemáticas...?

Se hai unha semana, o xornal El País daba publicidade aos estudos de Matemáticas, falando dunha empleabilidade do 100% para o alumnado que remata estes estudos, onte atopámonos na web de CRTVG o mesmo titular:

"100% de emprego e unha chea de saídas laborais"

E é que as matemáticas non son útiles soamente polas suás aplicacións prácticas en multitude de disciplinas senón polas competencias que desenvolven en nós cando as traballamos!

I Feira SansaLudoMates

O día 12 de maio de cada ano celébrase o Día Escolar das Matemáticas e quixemos aproveitar esta data para facer algo especial co que promover a nosa materia. Por iso eliximos o día 14 de maio para organizar unha pequena feira na que compartir xogos e actividades.

Dende o Departamento de Matemáticas queremos darlle as grazas a un montón de persoas que fixeron posible este proxecto:

- A todo o persoal do centro por colaborar e ofrecer a súa axuda para a montaxe da feira.

- A todo o profesorado de Infantil e Primaria por confiar en nós e dicir que si antes de saber onde se metían.

- A todo o alumnado de Infantil e Primaria que compartiu con nós ese día, esperamos que quedasen con ganas de repetir.

- E sobre todo as GRAZAS con maiúsculas ás nosas axudantes de Secundaria: Icía, Lucía, Alicia, Irene, Sol, Paula, Carme e Antía, porque sen elas non poderíamos telo feito. Moitas grazas nenas!

Convidamos a todas e todos a participar o vindeiro ano para poder repetir a experiencia!

En breve compartiremos algunha foto da Feira...

Retomando o traballo...

Despois do Entroido e do final da segunda avaliación, retomamos o traballo dos obradoiros dos martes para preparar a I Feira SansaLudoMates, un espazo que teña como protagonistas o xogo educativo e as matemáticas. O noso obxectivo nesta primeira edición é poñer a semente para que en vindeiros anos poidamos convertir esta actividade nun referente de convivencia e diversión.

Este ano, para comezar, prepararemos unhas actividades e xogos para o alumnado de Infantil e Primaria, supervisados e dirixidos por alumnado de Secundaria.

No Obradoiro deste martes tocou análise de xogos, o que inclúe comprensión das instrucións, valoración da adecuación para nenas e nenos de distintas idades... e por suposto posta en práctica dos mesmos!

Día Internacional do CREBACABEZAS!

Como temos días para todo... este martes, 29 de xaneiro, celebrábase o Día Internacional do Crebacabezas!
Os crebacabezas son xogos con moitísimos beneficios para o desenvolvemento das nosas nenas e nenos (para ver algúns deles podedes ler aquí), por iso quixemos aportar o noso graíño de area á promoción deste xogo, fabuloso en todas as suas variantes.

Aproveitamos o obradoiro do martes para facer un crebacabezas tradicional pero con sorpresa... un crebacabezas reversible.

Noraboa Sol, Paula, Irene e Carme por ese gran traballo en equipo en tempo récord!

E no tempo de lecer de hoxe organizamos un pequeno concurso de Tangram por parellas.

Felicitar as gañadoras: Lucía e Alicia, de 3º de ESO e darvos, a todas e todos os participantes, as grazas polo entusiasmo mostrado. Iso nos alenta a organizar máis actividades coma estas.

MOITAS GRAZAS!!!!

Este martes tivemos xornada de investigación

Que relación existe entre a lonxitude dunha circunferencia e o seu diámetro?

Sinxelo non? Se dividimos a lonxitude dunha circunferencia entre o seu diámetro sempre obtemos o número 𝝿!